OCCITÀNIA RESISTENTA

Un occitanisme original

Occitània Resistenta es una organizacion indigenista occitana. Pensa que les occitans son una mena d’indians d’Euròpa, a costat dels basques, dels bretons, des còrses o dels samis. Se les indians d’America son les amerindians, èm les “euro-indians”, qué.

Considèra donc le pòble occitan coma indigèna en Occitània e defend les dreits dels occitans a poder tornar dispausar de sa tèrra e a i víver libres segon sas costumas pròpias.

Occitània Resistenta vòl donar una descendença a totas las practicas indigènas d’Occitània que sián las manièras de comunicar —coma la lenga, solide— mès tanbens de se ganhar la vida, de se hèr una tuta, de manjar, de bolegar, de hèr la hèsta, de jogar e de s’amusar...

La realitat es que, dempuèi las prumèras invasions francesas, la populacion d’Occitània patís una alienacion de mès en mès prefonda. Nòstra analisi es que l’èra industriala, luènh de relativizar aquela sotmession, la complica e la refòrça.

Dins aquelas condicions, se pensar e se díser occitan vívent en Occitània es ja una mena de resistença. Sirà le prumèr pas d’una longa lista d’actes e de reflexions necessàrias a l’existença de nòstre pòble coma tal. Autant indispensable, es de hèr víver nòstra lenga, organe vital de nòstre pòble.

Una metodologia originala

Qué hasèm? Çò que podèm, pauròt! Pel moment nos èm limitats essencialament a l’informacion a travèrs de qualque paperòt distribuat a personas plan causidas. Pr’aquò, nos autorizam tota accion benefica a l’esperit de resistença occitana, a condicion que siásque realizabla e plasenta a realizar.

Occitània Resistenta es dispausada a collaborar ponctualament –o mès longtemps– ambe la gents que voldràn plan d’ela, se partejam afinitats ambe las diferentas personalitats implicadas e que la la collaboracion es adaptada a nòstas fòrças (realas, e non pas imaginàrias). Siriá plan tanbens de partejar, s’es possible, al mens un objectiu comun (mès aquò’s facultatiu).

Occitània Resistenta pòt tanbens vénguer quicòm de complètament diferent de çò qu’es presentat aciu, qui sap... Tot es possible!

Un foncionament original

Occitània Resistenta èra a l’origina una organizacion individuala que recampava en collectiu totas mas diferentas personalitats, sola solucion per las coordonar de caps a una accion politica. Se pòt aver problèmas de desdoblament de la personalitat e hèr politica, ça pensam. Aquò pòt mèma venir un aventatge segon la situacion.

Coma exemple de fondators de nòsta organizacion, avèm un occitanista ruralista, un breton solidari, un vegetarian antiespecista, un bascofile pro-abertzale, un anti-industrial per la descreishença, un pro-feminista culpabilizat...

Ara Occitània Resistenta recampa tanbens diferentas personas fisicas (en mès de recampar diferentas personalitats). Mès èster nombroses es pas sa vocacion prumèra. Sa vocacion prumèra es de nos perméter l’accion politica occitanista ludica a la saussa indigenista.

OFM,

Per Occitània Resistenta